Льыоравэтльан - РАБОТЫ ПОБЕДИТЕЛЕЙ КОНКУРСА ЭССЕ "МОЙ РОДНОЙ ЯЗЫК" (II-III МЕСТО)

МИННИ ЭВЭДЫ ТУРЭН

Минӈи гэрбим Настя. Би эвэдыду сагдыду гулэсэгту Нюгде кэргэннунми уриндем. Минӈи амтылим эвэнкил, би нян эвэнки биhим.

Амтылим урэду бидевкил, эниным «нульги таткитту» алагумнит хавалдяран. Аминым – этэечимни, бултамни, энинду бэлэтчэрэн.

Нуӈартын сот эвэдыт турэтчэрэ, би нян эвэды турэнмэ садем. Эвэды турэн тар сома сагдаhу турэн. Нонон эвэнкил Сибирь дуннэлин, Дальний Востокли дуннэлин нульгидечэтын. Эткэн-дэ эвэнкил бидерэ, эвэдыт турэтчэрэ. Кэтэ городтыл, гулэсэгил, бирал эвэдыт гэрбичидерэ.

Мутӈи Тындинскай районду нян кэтэ гулэсэгил эвэдыт гэрбичивдерэ. Гулэсэгим Нюгде эвэдыдук «нюксэ» гэрбичивчэ, лучадыт Усть-Нюкжа. Станциял: Юктали – эвэдыдук «юктэ», Хорогочи – «хороки», Олёкма – «олло». Город Тында эвэдыдук «тында» гэрбичивча.

Эвэды турэнми со ая, со гудей, сот аявдем би долчатчада эвэдывэ. Эткэн турэнми омновдёрон. Би гунмучэдем, эвэды турэн этэн олок сокоривра, бидыдеhан-да кэтэлвэ анӈанилвэ.

Анастасия Васильева, 9 класс, с. Усть-Нюкжа, Амурская область

МИННИ ЭВЭДЫ ТУРЭН

Би Андрей гэрбим. Эвэнкил Андо гунывкил. Дыгин классту татчам. Бута тэкэчи бисим. Эгданду аявуннам бидави.

Иеннэ – минни балдыдяк бикит. Бикит дагадун урэ бисин. «Адери хунат» гэрбин. Со гудейкан. Бира эяндерэн бикитнэчин гэрбин.

Иеннэду эвэнкил индерэ. Бутуннул эвэдыт турэчивкил. Кунакар-да, эдэрил-да, сагдыл-да. Сагдыл-эвэнкил кэтэ турэрвэ сарэ. Адылду турэрвэ эдэрил омнодеро. Тыкэ индерэв.

Би-кэ кунакан бихим. Кэтэ турэрвэ эчэм сарэ. Минэвэ минни эвам, эням, амам алагувкил. Минни тэхэлви бутуннул эгданду хавалдяра. Нунартын этэечимнил. Минду нян орор биси. Дэрумкил орактын, би эгдантыки уруннэм. Бэлэтчэннэм. Эрдэ илгиманнам. Орорво илбаннэм. Молвэ суннарэв, эдэвэр доноторо. Эгданду миннюн бутуннул эвэдыт турэчивкил.

Эдам омноро мэнниви турэнми. Адылвэ турэрвэ эннэм сарэ, он-кэ тара уйдоннэм. Би додум, эвэнки сахан. Тыкэ тыкин минду, минни эхэка гундерин…

Би эвэнки бисим. Экэллу мэннивэр турэнмэр омноро! Дендякал тыкин! Сакэллу турэнмэр! Су эвэнкил!

Андрей Колесов, 4 класс МОУ СОШИ им. Г.М. Василевич, с. Иенгра